مش عايز منك غبر قلبِك
د.غازى كلخ
مش عايز منك غير قلبك
يحضُنّي ف ليل العتمه
وبَرد الآه
ينعِشني لو قَلّ عني ف يوم أُكسجين الحياه
يكون لي الجَنّه في الصحرا
واكون لُه الجنايني ...
أزرَع أحلامي فيه
وازرَعو ف صدري
مكان قلبي إللي أخذتيه
من قبل عُمري ماتطلع شمسو
كُنتي قمرو ينَوّر لياليه
مش عايز منك غير قلبك
يوَنّسني ويُحرُسني
من عين بنات المدينه والمُعَسكر
ولو حَظي ف ليله حزينه تعَثّر ينشِلني
ويطَمّني ع بُكره .. يحلا أكثَر
ويهَدهِدني بسورة الكوثر
أناجي ربي واتشَكّرلُه
ع أكبَر نِعَمو..
حُبّك ياجمالو
الله يخليّه
مش عايز منك غير قلبك
والباقي للي خَطفِك مني
بالحلال .. حلال عليه
مش عايز منك غير قلبك
بَدَال قلبي إللي سَكَنتيه
ليست هناك تعليقات:
إرسال تعليق